Gaurkotasuna

Prentsa-oharrak

06/11/2002

Sandoval eta Alvarez lehen sarituak kontakizun laburretan

2002/11/06 Espainiako Independentzi Gerran eta Erdi Aroan girotutako bi istoriok irabazi dute Katedral Zaharrari buruzko Kontakizunen Lehiaketa.

2002/11/06 Independentzi Gerran, frantsesen okupazioaren urtetan Santa Maria Katedraleko parrokoarentzat lan egiten duen Urizaharreko neskatxa baten historia eta tenplu gotikoa eraikitzeari ekin zitzaion lehen urteetan familia batean gertatutako gorabeherak dira Santa Maria Katedrala Fundazioak antolatutako Kontakizun Laburren I. Lehiaketa irabazi duten ipuinen argudioak.

Helduen artean Ana Sandovalen "La espada de Nápoles" eta Asier Alvarez de Arkaiaren "Ametsak elurpean" izan dira irabazleak, gaztelerazko eta euskarazko sailean. Txapelketara ia ehun lan aurkeztu ziren. Epaimahaikideek partaidetza handia izan dela eta gaztelerazko kontakizunetan 18 urtetik gorakoen atalean maila bikaina lortu dela azpimarratu zuten erabakiaren berri ematerakoan.

"La espada de Nápoles" kontakizunean, XIX. mendean, Independentzi Gerraren (1808-1814) eta frantsesen okupazioaren garaian, girotutako istorioa kontatzen du Ana Sandovalek: Urizaharreko neskatxa bat Gasteizera joatera eta Santa Maria Katedraleko parrokoaren esanetara lan egitera behartzen dute. Asier Alvarez de Arkaiak, berriz, Avendaño familiaren gorabeherak azaltzen ditu "Ametsak elurpean" kontakizunean, baina ardatz nagusia familiaren eta tenpluaren harremanak ditugu, Victoria zaharrean Katedral Zaharra eraikitzen hasi ziren urteetan.

18 urtetik beherakoen saileko irabazleak Edurne Iñigoren "El secreto de la Catedral" eta Oier Llinasen "Koblakariaren sorginkeria" izan dira. Lehen kontakizunaren protagonista Gasteizko mutil gazte ikasle bat da: ustekabean, Grial Santuarekin zerikusia duen liburu zahar-zaharra aurkitzen du Katedralean. Liburuak dioenez, litekeena da Griala Gasteizen egotea. "Koblakariaren sorginkeria" hirian eta Katedralean zehar juglareen atzetik ibiltzen diren haur batzuen bizimoduan oinarritutako kontakizuna dugu.

18 urtetik gorakoen gaztelaniazko kontakizunen sailean José Antonio Nájeraren "La ciudad rosa" eta Alberto Echevarríaren "Un duende en la Catedral" istorioek irabazi dute bigarren eta hirugarren saria, hurrenez hurren, eta 18 urtetik beherakoen sailean Alexandra Arenazaren "La última botella" eta Laura Hernándezen "Lágrima de Luna" lanek. Euskarazko saileko saridunak, berriz, honako hauek izan dira: Josean Buenoren "Ez dakit, aitite" eta Antonio Zubeldiaren "Santa Mariako mamua" 18 urtetik gorakoen artean eta Aramaioko Irantzu Martínezen "Eta orain, zer?" eta Gustavo Bañosen "Antzinakoak" 18 urtetik beherakoen artean.

Kontakizun Laburren I. Lehiaketan ia ehun lan aurkeztu dira, gehienak gazteleraz. Nahitaezkoa zen argudioa Katedral Zaharrean girotuta edo kokatuta egotea. Epaimahaikideek -idazleak, unibertsitate eta institutuko irakasleak eta kazetariak ziren- kontakizunak, batik bat 18 urtetik gorakoen gaztelerazko sailekoak, bikainak izan direla azpimarratu dute.

Lanetan era guztietako korapiloak eta ikuspegiak landu dira. Azpimarratzekoa da, ordea, egileek asko dakitela Katedralaz. Maitasun-istorioak, hilketak, misterioak, pertsonaia bitxiak... iraganeko kontuak, batik bat Erdi Arokoak, eta gaur egungoak... denetarik dago kontakizunetan. Helduen saileko irabazleei 300, 200 eta 150 euro emango zaizkie, hurrenen hurren, eta 18 urtetik beherakoei 250, 150 eta 100 euro materialetan. Gainontzeko parte-hartzaileen meritu-diplomak azaroaren 11tik, astelehena, aurrera Santa Maria Katedrala Fundazioan egongo dira.

Astearte honetan, Rosa Regásen hitzaldia
Lehiaketako sari guztiak hilak 5ean, asteartea, banatuko dira Rosa Regás idazleak Europa Biltzar Jauregian emango duen hitzaldia hasi baino lehen. "La canción de Dorotea" lanarekin 2001eko Planeta Saria irabazi zuen idazle katalanak emango du "Katedrala ezagutzen" zikloko bigarren hitzaldia, Ken Folletten ondoren: "Monumentos de la cultura en la realidad y en la ficción" (Kultur monumentuak errealitatean eta fikzioan).