30/09/2003
2003/09/30 Udako hilabeteetan Gasteizko Katedral Zaharra eraberritzeko lanak ikustera etorritako bisitari-kopurua tenpluak ateak ireki zituenetik (1999) egon den handiena dugu. Ekainetik irailera bitartean, 40 herrialde baino gehiagotako ia 25.000 (24.755) lagunek hartu zuten parte ibilbide gidatuetan; iaz garai berean baino %30 bisitari gehiago izan ditu, beraz.
Santa Maria Katedrala zaharberritzeko lanak gero eta ikusmin handiagoa ari dira sortzen, batetik, proiektuak etengabe eboluzionatu duelako, eta bestetik, bisitetan berrikuntzak sartzen direlako beti. Joan zen apirilean balio historiko handiko txoko ezagunak ere barne hartzen dituen ibilbide berria eskaintzen hasi ziren, eta kontuan hartu behar da jendeak hamarkada luzeak eman dituela horiek ikusi ezinik.
Bisitariek hamaika alderdi ezagutzen dituzte: Katedraleko zutabeak sendotzeko lanak, zaintzaileen erronda-pasabidea, arkupeko polikromiak ikertzeko eta zaharberritzeko jarduerak... eta gainera, nobedade garrantzitsuak, hala nola, Santiago Kapera, hainbat hamarkadatan itxita egon den XIV. mendeko eskailera kiribiletik igo ondoren ikusten dutena.
Osagai horiei guztiei eta beste hainbati esker bertaratu da halako jendetza handia. Bisitari-kopuruaren gorakada handiaren ondorioz, talde gehiago antolatu behar izan dira. Uztailean eta abuztuan ohikoa baino sei talde gehiago osatu ziren eta hainbat astez 400 lagun inguru etorri ziren egunero Katedral Zaharra ikustera. Aipatzekoa da, hala ere, kopuru hori obrentzat gomendatuta dagoena baino askoz ere handiagoa dela.
Hirutik bi, Arabatik kanpokoak
Bisitarien %66 Arabatik kanpokoa zen eta %14 atzerrikoa. Bisitak 6 hizkuntzatan
egin dira: gazteleraz, euskaraz, ingelesez, frantsesez, italieraz eta
alemanez. Abenduaren 31ra arte ia 5.000 erreserba daude eginda. Beraz,
katedrala jendearentzat berriro ireki zutenetik (1999) aurtengo urtearen
bukaerara arte, bisitariak ia 300.000 izango dira. Bisitarako ordua hartu
nahi dutenek 945 255 135 telefonora deitu edo www.catedralvitoria.com
helbidera jo dezakete.
Gasteizko turismo-arduradunek adierazi dutenez, bisitari-kopuru handiak
eragin nabarmena izan du turismoaren gorakada izugarrian. Udako hilabeteetan,
Arabako turismoa %11 hazi da, Eusko Jaurlaritzaren datuen arabera. Izan
ere, lurralde horrek lortu ditu, alde handiarekin gainera, Euskal Herriko
emaitza konparatiborik onenak.