Gaurkotasuna

Prentsa-oharrak

19/05/2004

Katedralaren web guneak bere irudi eta edukiak berritu ditu

2004/05/19 www.catedralvitoria.com web guneak ingurune grafiko berria eskaintzen du, edukiak azkar eskuratzeko.

2004/05/19 Zaharberritzeko proiektua zehatz-mehatz ezagutu, tenpluko bazter guztietatik bisitaldi birtual ikusgarria egin, bisitarako erreserbak on-line, dibulgazio eta kultur ekitaldi guztien berri jakin edo merchandisingeko artikuluak erostea. Santa Maria Katedrala Fundazioaren web guneak eskaintzen dituen aukera batzuk besterik ez dira horiek. Izan ere, 2004ko maiatzetik aurrera, web guneak irudi eta eduki berriak izango ditu.

Duela bi urte inauguratu genuenetik, urtean batez beste 50.000 bisita jaso eta 600.000 orri kontsultatu direla kontuan hartuta, www.catedralvitoria.com publikoarekin harremanetan egoteko funtsezko tresna bilakatu da. Aldaketa nagusiak ingurune grafikoaren modernizazio orokorrari dagozkio, bai testuak bai argazkiak berritu egin baitira. Goitibeherako hainbat menuk lehen baino askoz ere informazio osatuagoa eta eguneratuagoa eskaintzen dute.

Horrez gain, web guneak berrikuntzak jasotzeko atal berria erantsi du, internautei azken orduko albisteen berri emateko, bereziki Santa Maria Katedrala Fundazioak antolatzen dituen ekimen guztien eta horietan parte hartzeko moduaren berri emateko.

Atzeko planoko bost irudiak
Bestalde, bilatzeko sistemak informazioa azkar eskuratzeko aukera ematen du. Era berean, Katedral Zaharraren web guneak internautekiko komunikazioa areagotu egingo du, bisitak erreserbatzeko sistema askoz ere modernoagoa duelako eta estekak nahiz web orri interesgarriak gehitzeko bidea ematen duelako. Gainera, nahi dutenek Katedralaren motiboak dituzten atzeko planoko bost irudi eta pantaila-babesle bat jarri ahal izango dituzte beren ordenagailuetan.

Web gunearen bertute nagusia zera da, bere edukiak Arkitektura, Arkeologia, Historia edo Artearen alorretako profesional eta espezialistengana ez ezik, publiko guztiarengana ere zuzenduta dagoela. Lehenengo mailako hiru atal nagusi ditu: Katedrala, Zaharberritzeko lanak eta Fundazioa. Atal bakoitzak, informazioarekin batera, Katedralaren argazki-sorta zabala eskaintzen du, baita zaharberritzeko prozesuaren hainbat ikuspegi ere.