11/07/2006
Gasteiz, 2006ko uztailaren 11.
Kantu Gregorianoaren Koruak eta Judith Cohen etnomusikologo kanadarrak
eskainitako kontzertu arrakastatsuen ostean, Santa Maria Katedralak
ateak ireki dizkio berriro ere musikari Tolosako (Frantzia) Haur
Kantarien Koruak eskainiko duen errezitaldiaren bidez. Kontzertua
“Katedrala ezagutzen” programazioaren baitan dago
antolatuta eta datorren astelehenean, maiatzak 17, emango da.
Tolosako (Frantzia) Haur Kantarien Koruak emango duen kontzertua bi
zatitan banatuta dago: zati bat musika sakratuak osatzen du eta bertan
Mozart, Kodaly, Durufle eta Bruckner konpositoreen obrak abestuko
dituzte. Beste zatia, berriz, kantu profanoek osatzen dute; bertan,
munduko zenbait herrialdetako eta estilo desberdinetako musika izango
da entzungai, besteak beste, Filipinak, Txekiar Errepublika eta
Indonesia.
Kontzertura joan
nahi dutenek gonbidapena Santa Maria Katedraleko Bisitarien Zentroan,
Buruileria plazan, eskuratu ahal izango dute bihar asteazkenetik
aurrera. Ordutegia 10:30etatik 14:00etara eta 16:30etatik 20:00etara
izango da.
Tolosako (Frantzia) Katedraleko Haur Kantarien Koruak, Georges Rey
abadeak 1936an eratua, 70. urteurrena ospatzen du aurten. Tolosako
Saint Etienne Katedraleko koru gisa sortu zen eta bere sorreraren
tradizioari jarraituz, mutikoz soilik osatuta dago, 8-20 urte bitarteko
mutikoz. Egun, koruaren errepertorioa moteteek eta garai guztietako
obra sakratuek ez ezik, munduko alde guztietako obra eta musika
profanoek ere osatzen dute.
Tolosako Katedraleko Haur Kantarien Koruak kontzertuak mundu osoan eman
ditu –besteak beste, Kanada, Ameriketako Estatu Batuak,
Antillak, Polonia, Ukraina, Jordania, Libano– eta, gainera,
mota askotako auditorioetan abestu dute, kontzertu-areto
entzutetsuenetatik parroki txikietara.
Katedraletako eskolania Tolosa hiriaren une garrantzitsuekin
erlazionaturik dago. Une garrantzitsu horiek zenbait kasutan une
serioak izango dira (AZF zentral kimikoko biktimen aldeko meza, Claude
Nogaro abeslari frantziarraren oroimenez ospatutako meza eta abar)
beste zenbait kasutan, berriz, jai girokoagoak (Ingalaterrako
Erreginaren bisita, Frantziako Espazio Hiriaren inaugurazioa eta abar).
Haur Kantariek Tolosako Kapitolioko opera-antzokian sarritan hartzen
dute parte musika-produkzioetan, hala nola: Jeanne au bûcher,
G. Prêtre-ren zuzendaritzapean edo Faureren Requiema, Michel
Plasson-ekin. Datorren azaroan, kontzertuan ikusi ahal izango ditugu
Tolosako Ganbera Orkestrarekin.
Tolosako Katedraleko Haur Kantariek musika sakratuko zenbait disko
– Motets du XVI au XX (XVI-XX. mendeko Moteteak) eta Chants
sacres (Kantu Sakratuak) Roberto Alagna-rekin–
musika profanoko diskoak –Carnet de route (Ibilbide Orria
)eta Eguberritako zenbait obren diskoak –Noël
Baroque (Eguberri Barrokoa)– grabatu dituzte.
Rey abadearen ondoren, taldearen buruzagitza hainbat zuzendariren esku
egon da, horien artean: David Godfroid, Kapitolioko Haurren Koruaren
egungo zuzendaria; Wilfried Busaal eta azken bi urtez geroztik,
Victoria Digon.