18/12/2006
Vitoria-Gasteiz, 2006ko abenduak
18. Euskadi eta Nafarroako Arkitektoen Elkargo
Ofizialaren Arabako ordezkaritzak Gasteizko Santa Maria Katedrala
Fundazioari eman dio Olaguibel Saria. Gaurkoan, abenduaren
18an, arkitekto gasteiztarrak bere lan handiaren, Espainia plaza
neoklasikoaren, planoak sinatu zituen egunaren urteurrenarekin bat
datorren egunean entregatu da saria. Gaur bertan, eta oroitzapenezko
ekintzen barruan, arkitektoen gremioak tenplu gotikoa bisitatu
du.
Arkitektoen Elkargokoaren presidentea den Angel Luis Bellidoren
esanetan, “tenplu gotikoa berreskuratzeko egiten ari den
lana” aitortzeko eman diote Santa Maria Katedrala Fundazioari
sari hau.
Bestalde, Ramón Ruiz-Cuevas arkitektoaren iritziz,
arkitekturaren hedapenaren eta hiriaren memoria historikoa bizirik
mantentzearen alde erakundea egiten ari den lanaren aitorpena da saria.
“Kanpotarrak erakartzeaz gain, katedral gotikoa, hodiz
jositako gaixo bat bailitzan, ZIUra eramateko ideia bikaina izan
du” adierazi zuen Ruiz-Cuevasek.
Gasteizko Udaletxeko harrera-aretoan entregatu da saria. Heraclio
Fournierrek erabiltzen zituenak bezalako harri bat izan da saria, hots,
Solenhofengoa, Olaguibelen Espainia plazaren proiektuaren hegoaldeko
aurretiko bista landua zeramala. Laurentino Aliende izan da
diseinugilea. “Bide batez, inoiz izan den euskal arkitektorik
onenaren irudia omentzen dugu” nabarmendu zuen Ruiz-Cuevasek.
Ekitaldian, halaber, Olaguibelen omenezko marrazki-lehiaketan irabazle
izan denari ere eman zaio saria. Elkarren segidako laugarren urtez,
profesional gasteiztar honen beste bi lan garrantzitsuren omenez, egin
dituzte lanak Arabako ikastetxe guztietako 14 urtetik beherako
ikasleek: Aihotz plaza eta Arkupeak.