09/09/2008
Vitoria-Gasteiz, 2008ko irailaren 9a.- Santa
Maria Katedrala Fundazioak datorren asteburuan “Kontzertuan eta
irekita” programaren edizio berri bati ekingo dio. Aurtengo musika
ikuskizunak askotarikoak izango dira eta azpimarratzekoak dira Kinteto
Sonos eta Leonor Watlingen Marlango taldeen esku-hartzeak.
Uda osoan zehar entzuleriak kultur ekimen honen inguruan eman duen
erantzun bikainaren ondoren, Santa Maria Katedrala Fundazioa
udazkenerako musika programazio interesgarria prestatzen ari da, eta
berriro ere, zaharberriturako arkupean gauzatuko da.
Arabako hiriburua bisitatuko duten talde ospetsuenetariko bat Leonor
Watling aktore eta abeslariaren taldea izango da. Alejandro Pelayo
piano-jole eta konpositorea eta Óscar Ybarra tronpeta-jolearekin
batera, Marlangok urriaren 4an Santa Maria Katedralean kontzertu bat
eskainiko du eta bertan, beren hiru lanetako soinuak joko dituzte.
Jazz, blues eta rock musikaren eraginekin eta Tom Waitsen musikak
sortzen duen giroarekin, Watlingek eta bere taldeak ‘Marlango’,
‘Automatic imperfection’ eta ‘The electrical morning’ (kaleratu duten
estudioko hirugarren lana) lanen berrikuspen bat egingo dute.
Baina Marlangok jo baino lehen, “Kontzertuan eta irekita” programa
irailaren 13an hasiko da Kinteto Sonos taldearen kontzertuarekin.
Pianoa eta hari-instrumentuz osatutako boskote hau Euskal Herriko
Goi-mailako Musika Eskolan sortu zen Gabriel Loidi maisuaren
tutoretzapean. Taldeko kideak Itxaso Etxebarria (pianoa), Xabier de
Felipe (biolina), Daniel García (biolina), Alba González (biola) eta
Beatriz Blanco (biolontxeloa) dira. Kinteto Sonos taldea goi-mailako
ganbera musikako interprete gazteen eredurik onenetariko bat da.
Astebete geroago (larunbata 20) Iñaki
Salvador piano-jolea arituko da arkupean. “Te doy una canción”
ikuskizunean musikari talde batekin arituko da, baita Asier Hernández
aktorearekin ere, bere bi pasio handiak batzeko, hots, jazza eta
autore-musika. Kontzertu honetan askotariko abestiak eskainiko ditu,
konplexurik gabe, hautatu dituen lanak bere oroimen musikal eta
afektiboaren araberako konposizioak dira.
Kontzertu guztiak arkupean egingo dira arratsaldeko 20:00etan. Sarrera
librea izango da Marlangoren kontzertuaren kasuan izan ezik, izan ere,
Fundatzaileen Elkarteko kide ez diren pertsonek 5 € ordaindu beharko
baitituzte. Bazkide ez direnek sarrerak Bisitariei harrera egiteko
Zentroan jaso beharko dituzte urriaren 1ean, 2an eta 3an.