23/05/2008
Vitoria-Gasteiz, 2008ko maiatzaren 23a.- Julio
Llamazares idazleak datorren asteazkenean Gasteizen “Las rosas de
piedra” liburua aurkeztuko du. Liburu hori Espainiako katedraletatik
egindako bidaia bat da eta Gasteizko tenplu gotikoa ere aipatzen du.
Hitzaldia tenpluko arkupean izango da arratsaldeko 20:00etan, Santa
Maria Katedrala Fundazioak antolatutako “Katedralaren inguruko
topaketak” zikloaren barruan. Sarrera librea izango da leku guztiak
bete arte.
“Hau denboran eta geografian egindako bidaia bat da (...) Hirugarren
milurtekoa hasi zenean ekin nion eta egunen batean bukatuko dut, beno,
hori espero dut, herrialde honetako katedral guztietatik igaro
ondoren”, dio Julio Llamazaresek Las Rosas de Piedraren lehenengo
liburukiaren hasieran. Bertan, Espainiako iparraldeko katedralez aritu
da eta dagoeneko bigarren zatian ari da lanean.
Gasteizko Santa Maria
Katedralaren kasuan, bidaiaria “Gasteizko katedralaren obra amaigabeez
interesatzen da, hau da, 5.000 milioiko zaharberritze lanen
katedralekoez. Garai hauetako bereizgarrietariko bat da gehien kexatzen
direnak gehien jasotzen dutenak direla” dio idazleak, kaleko pultsu
politikoari arreta berezia eskainiz eta bereizgarria azpimarratuz.
Llamazaresek Espainiaren inguruan
daukan ideiari jarraiki, idazleak sei bidaia gauzatzen ditu eta bertan,
bere sentimenduen mugak ere aipatzen ditu, bidaiariak “gustuak
iradokitzen dizkion mugetan” soilik sinisten baitu.
Lehenengo bidaian Galiziaraino iristen da. Santiago, Tuy, Ourense eta
Lugotik igarotzen da Mondoñedoko Elizbarruti ahaltsu ohian sartu baino
lehen, bertan, oraindik ezkutuko feudalismo bat dago bizirik eta betiko
Galiziaren espiritua pizten da. Asturias eta Leon batu zituen El reino
perdido lanean hainbat katedral azaltzen dira, Oviedokoa, Leongoa (bere
harri gaixoekin), Astorgakoa, Zamorako, Salamancako biak eta Ciudad
Rodrigokoa (hau Espainiako apezpikutzarik txikiena dela diote).
Donde la vieja Castilla atalburuan Santanderreko katedral erreari buruz
hitz egiten da, ondoren, Burgos, Valladolid eta Avilako filigranetara
igarotzen da eta gero, Euskal Herriko hiru hiriburuetako tenpluez,
Iruñekoaz eta Calahorrakoaz mintzatzen da, eta Errioxako Santo Domingo
de la Calzada katedralean bizi diren oilar eta oiloaren istorioa
kontatzen du.
Aragón de norte a sur izeneko atalburuan, aldiz, bere oroimenera jotzen
du, Pirinioetako perlatik Jacara igarotzen da eta gero, Albarracingo
katedralaren txirotasuna deskribatzen du, eta gero Pilarra, hau da,
Vatikano txikiko tenplu handia aipatzen du, izan ere, Aragoik berak
txikitan bizi izan zituen liturgiak gogora ekartzen baitizkio.
Lehenengo liburuki honen bukaerako atalburua Las seos de Cataluña da,
eta bertan, Lleida, Bartzelona, Girona edo San Feliu de Llobregateko
tenpluak deskribatzen dira, besteak beste.