08/10/2008
Vitoria-Gasteiz, 2008ko urriaren
8a.- Boreas Cámara talde gasteiztarrak Pack of new
Cotillons izenburuko lan berria aurkeztu du gaur. Santa Maria
Katedralean grabatutako lana da eta Arabako hiriburuko Fournier Karta
Museoan aurkitutako karta-sorta batetik jaiotako abestiek
osatzen dute. XVIII. mendearen bukaerako herri-kantu txiki batzuk dira.
Hasieran, lan hau Fournier Museoko biltegietan sortu zen, bertan
baitzegoen aparteko karta-sorta hori, eta karta bakoitzak dantzatxo
baten musika zeukan idatzita. Karta-sorta gaur egun munduan dauden
‘Longman and Lukey’s Complete Pack of New Cotillons’en bi kopietariko
bat da. Dirudienez, Félix Alfaro Fournierrek 1970ean enkante publiko
batean ‘de la Rue’ bilduma erosi zuen Sotheby’s enkante-etxean. Bilduma
horretan 500dik gora karta-sorta eta beste agiri, marrazki eta liburu
batzuk zeuden. Karta-sorta hau horien artean zegoen 365 zenbakiarekin
identifikatuta. Arabako Foru Aldundiak 1984an bilduma osoa erosi zuen.
Hasiera-hasieratik Boreas Cámara taldeko kideak liluratuta geratu ziren
karta horien soinu kutxuagatik, hori dela eta, ez zen zaila izan kartei
musika aurkitzea. Instrumentazioa garatzeko Josean San Miguel
musikologoaren laguntza izan dute.
Diskoa XVIII. mendearen
bukaeran modan zegoen dantza musikako lanen bilduma bat da eta esparru
zabal samarra besarkatzen du: Erdi Aroa, Errenazimendua, Barrokoa eta
Klasizismoa. Herri-musikako lan txiki-txikiak dira eta gehienetan, ongi
pasatzeko daude konposatuta.
‘Pack of new Cotillons’ lana osorik grabatu zuten Santa Maria
Katedralean uztailaren 6tik 11ra arteko gauetan. Eta aipatzekoa da
Gasteizko Udalaren diru-laguntzarekin egin dela.
Diskoak Santa Maria Katedraleko Bisitarien Harrera Zentroan (Buruileria
plaza) eskuratu daitezke 10 eurotan.