18/11/2008
Vitoria-Gasteiz, 2008ko
azaroaren 18a.- Santa Maria Katedrala Fundazioak
hiru kontzertu antolatu ditu arkupean datorren asteburuan Santa Zezilia
eguna, hots, musikarien zaindariaren eguna ospatzeko. Ostiralean
arratsaldeko 20:00etatik aurrera Bóreas Cámara taldeak bere azken lana,
Pack of new Cotillons izenburukoa aurkeztuko digu, baita larunbat
eguerdian ere. Juan Carlos Pérez, aldiz, larunbat arratsaldean izango
dugu antzeztokian eta bere azken hiru lanen errepasoa egingo du.
Uztailetik lortutako emaitza bikainen ondoren, ´Kontzertuan eta
irekita` ekimenean hiru ikuskizun bereziko asteburu bikaina prestatu
da. Santa Zezilia eguna dela eta, Santa Maria Katedrala Fundazioak
prestatu dituen hiru ikuskizunek entzule ugari erakarriko dituzte
Gasteizko tenpluko arkupera.
‘Kontzertuan
eta irekita” azaroaren 21ean, ostirala, hasiko da
arratsaldeko 20:00etan Bóreas Cámararen kontzertuarekin. Talde honek
joan zen udan Gasteizko tenpluan bertan grabatu zuen lan berria
aurkeztuko digu. Karta-sorta batetik sortu zen Pack of new Cotillons
lanean XVIII. mendearen bukaerako herri-kantutxo batzuk bildu
dituzte.
Lan hau Fournier Museoko biltegian jaio zen, bertan baitzegoen ezohiko
karta-sorta hura: karta bakoitzean dantzatxo baten musika zegoen
idatzita. Longman and Lukey’s Complete Pack of New Cotillons
karta-sorta bi soilik geratzen dira munduan. Hasiera-hasieratik,
Gasteizko Udal Bandan jaiotako Bóreas Cámara taldea liluratuta geratu
zen karta haien soinu giroagatik, hori dela eta, ez zitzaien asko
kostatu kartei musika aurkitzea. Instrumentazioa garatzeko, Josean San
Miguel musikologoaren laguntza izan dute. Disko honetan
XVIII. mendearen bukaeran modan zegoen dantza musika bildu da eta
esparru zabal samarra besarkatzen du, hots, Erdi Arotik Klasizismora
arte, Errenazimendua eta Barrokoa barne. Herri-kantutxoak dira, eta
gehienak ongi pasatzeko konposatu ziren.
Ikuskizuna larunbatean eguerdiko 12:00etan errepikatuko dute arkupean.
Eta arratsaldean Juan Carlos Pérez,
Itoiz talde mitikoaren burua, izango dugu ikusgai. Pérez Atlantic
Riverrera garamatzan talde batekin itzuli da. Hasierako hirukoari
haize-instrumentuzko sekzio bat erantsi dio eta Santa Maria Katedralean
bere errepertoriorik landuenena eskainiko digu beretzat oso erosoa den
formatuan. Hiriko istorioak ikuskizunean bere azken hiru lanen
errepasoa egingo du eta errepertorio berri honetara hoberen egokitzen
diren lanak joko ditu.
Hiru kontzertuak doakoak izango dira, baina arkupean entzule kopuru
jakin bat soilik sartzen denez, beharrezkoa izango da gonbidapenak
bihartik aurrera (asteazkena) Santa Maria Katedraleko Bisitarientzako
Harrera Zentroan (Buruileria Plazan) jasotzea. Gehienez bi gonbidapen
entregatuko dira pertsona bakoitzeko.