06/04/2009
Gasteiz,
2009ko apirilaren 6a.- Santa María Katedralak
bisita-ordutegia luzatuko du Aste Santuan, dituen eskariei erantzun
ahal izateko. Larunbatetan ere horixe egingo da, irailera arte, eta
neurri horri esker katedrala irekita egongo da goizeko 10etatik
arratsaldeko 8ak arte etenik gabe. Halaber, familientzako bisita bat
ere eskainiko du, batez ere haurrentzat zuzenduta.
Santa María Katedrala zaharberritzeko prozesuak gasteiztarren eta
bisitarien interesa pizten jarraitzen du. Eskaria handia denez, eta
beste hiri batzuetatik datozenak sartu gabe gelditu ez daitezen tokirik
ez dagoelako, Aste Santuan bisita gidatuak ere izango ditugu eguerdian,
eta eliza ikusteko aukera izango dugu goizeko 10etatik arratsaldeko 8ak
arte. Horixe bera egingo dugu larunbatetan eta jai-egunetan (igande ez
badira) irailera arte.
Gainera, eliza gotikoa ikusteko familientzako bisitak ere
egiten hasiko gara. Ohiko bisiten ibilbide bera egingo da, baina
haurrentzat batez ere direnez, gazteenei egokitutako hizkuntza
eta azalpenak erabiliko ditugu. Hasiera batez, familientzako
bisita horiek apirilaren 9, 10, 11 eta 12an izango dira arratsaldeko
4etan, eta baita larunbatetan ere (irailera arte). Jai-egunetan ere
hori eskaintzeko aukera aztertzen ari gara, betiere eskariaren arabera.
Bestalde, eta Gasteizko Udaleko Turismo Zerbitzuaren eta ostalaritzako
lokal batzuen laguntzarekin, “Vitoria-Gasteiz, pintxoetan” izeneko
turismo-paketea sortu dugu. Ekimen horren bidez, Katedrala eta harresia
taldeka bisitatuko dute eta, ondoren, zerbait edan eta pintxoren bat
hartzeko aukera izango dute taberna batzuetan. Ibilbide hori
arratsaldeko azken orduan egingo da, apirilaren 9tik 12ra bitartean eta
larunbatetan (ekaina amaitu arte).
Gainera, Santa María Katedralak umeentzat haur-tailerrak
antolatu ditu Aste Santurako. Kasu honetan “La muralla-
Harresia” tailerra dugu; apirilaren 14an burutuko da. 8 eta 11 urte
bitarteko haurrentzat gomendatzen da, eta bi saio egingo ditugu. Bat
euskaraz, 10:30etatik 13:00era, eta bestea gazteleraz, 16:30etatik 19ak
arte.
Tailer honetan gaztetxoek maketa-eremua eta katedralaren nabe
nagusia bisitatuko dute, eta baita harresia ere, eta harresian
historia, funtzioa, eraikuntza eta katedralarekin duen lotura azalduko
diegu. Ondoren, tailerrean harresi bat egin beharko dute emango
dizkiegun zenbait materialekin. Horrela bada, kartoiarekin harresiaren
oihala edo mihisea egin ahal izango dute, komuneko papereko
biribilkiekin dorreak egingo dituzte, eta plastilina erabil dezakete
zenbait xehetasun egiteko. 5 euro ordaindu beharko dira, eta 2 euro
Fundatzaileen Elkarteko kide izanez gero; erreserbak egiteko 945 255
135 telefono-zenbakira deitu.