10/06/2009
Vitoria-Gasteiz, 2009ko ekainaren 10a.- Santa María
Katedralaren elizpean aste honetan beste bi musika-jarduera izango
ditugu, “Kontzertuan eta Irekita” programaren barruan. Bihar,
osteguna, Luis Aramburu Musika Eskolako ikasleak izango dira
protagonistak, ikasturte amaiera dela-eta kontzertua eskainiko baitute;
larunbatean, Lautada Abesbatzak jendeari errezitaldi polifonikoa
eskainiko dio eta horretarako Arabako egile batzuen zenbait lan
aukeratu dituzte. Doakoak izango dira, baina gonbidapena hartu behar
duzue.
Iaz bezala, Luis Aramburu Musika Eskolako ikasleek ikasturte
amaierako kontzertua emango dute Katedralaren elizpean. Eremu
horretan hamabost bat pieza joko dituzte, eta horrekin eskolako
irakaskuntzaren kalitatea eta ikasturtean ikasitakoa erakutsiko digute;
Eskola hirigune historikoan dago. Bertaratukoek eskolako flauten
taldearekin —Elzbieta Podoloyaren zuzendaritzapean Bach-en zenbait lan
joko dituzte—, hari-zazpikotearekin —Pergolesi-ren “Stizzoso mio
stizzoso” joko dute— edo eskolako abesbatzaren ahotsekin gozatuko
dute.
Gainera flauta eta akordeoi bikoteak eta piano eta flauta bikoteak
izango dira, eta baita akordiorako piezak eta haize eta perkusio
tresnekin egindako interpretazioak ere. Errezitaldia 19:15ean
hasiko da, sarrera doakoa izango da, baina gonbidapena hartu behar da
Bisitarientzako Harrera Zentroan.
Luis Aramburu Udal Musika Eskola 1992. urtean sortu
zuten, eta urteen barrena edozein adineko ikasleei musika-irakaskuntza
eskaintzen dien eskola emankor bihurtu da; gainera, gero eta ikasle
zein irakasgai gehiago ditu. 1.400 ikasle eta hogeita hamar bat
irakasle baino gehiago dira; irakaskuntza lau mailatan egituratuta
dago, eta eskolak musika-tresna talde egonkor batzuk ditu.
Bestalde, ekainaren 13an Lautada Abesbatza eszenatokira igoko da
errezitaldi polifoniko bat eskaintzeko, Arabako egile batzuen obren
aukeraketa bat alegia. Olabide Ikastolaren barruan sortu zuten 1985.
urtean, ikasleen gurasoen ekimenez. Helburua hemen zein kanpoan musika
zabaltzea eta garatzea izan da beti. Errepertorio zabala du,
eta nabarmentzekoa da musika polifoniko erlijiosoa, eta baita egile
ospetsu batzuen musika folklorikoa ere (Guridi, Iradier edo Aramburu,
besteak beste).
Jesús Merinoren zuzendaritzapean, Lautada Abesbatzak hainbat
abesbatza-truketan parte hartu du Euskadin eta Euskaditik kanpo.
Nabarmendu dezakegu, adibidez, martxoan parte hartu zuela Itsasuko
“Arraga” Abesbatzarekin egindako trukean Cambó-les-Bais-en (Lapurdi),
edo apirilean kontzertu batzuk eman zituela Salobreñan (Granada).
Larunbatean Katedraleko elizpean emango duen kontzertua
20:00etan hasiko da, eta Luis Arambururen (“Gaur Akelarre Gorbeian” edo
“Sanctus”), Sebastian Iradierren (“La Paloma” eta “El chin chin chan”),
Hilario Extramianaren (“Kukua Euskal Herrian”) edo Alfredo Donnayren
obrak abestuko dituzte, besteak beste.
Toki kopuru mugatua dagoenez, errezitaldira etortzeko beharrezkoa
izango da gonbidapenak Bisitarien Harrera Zentroan (Buruileria Plazan)
jasotzea.